Worklich wuhre Geschichtn
                      aus dr Leipschn Gegnd.
                                       Dr Pepsch und de Liene

   

    Im Leipe rimm, do is die Gegnd schiene;
    Ej Wortshaus hottn dorte Pepsch und Liene,
    Worn hibsche Leute , domols noch ganz jung
    Und fleissich wornse, hottne Gald genung,
    Ock tronk dr Pepsch ej bissl zu geschwinde,
    Do gobs ou Krach ims Wortshaus bei dr Linde.
    Ejmol worsch s Waatr ou ne grode gutt,
    Dr Pepsch dar schutte ejs siech undrn Hutt,
    So kohms zu enn, dos hejsst gehörchn Streite,
    Doss offn Dorfe liefn zomm de Leute.
    De Liene sprong geschwind de Treppe nuff
    Sunst kriggte se amende noch ejs druf;
    Dr Pepsch, dar wolldsr tichtich noch vrkoufn,
    Destwagn kohm ar flink einoochgeloufn;
    Ock worn vunn Biere har de Beijne schwer,
    Sudoss ar off dr Treppe glei gestolprt wär.
    De Liene wor drweile offn letztn Stuffn,
    Do hortmarsche off ejmol ängstlich ruffn:
    Pepsch, Pepsch, du worscht doch ne amende folln?!
    Und su ej gudes Weib, dos hottar wixn wolln.