Do denktmr dro!
Nej g(k)ucktock naus, nej sattock hie,
Do draussn liegt jo neuor Schnie,
Dos hood geschneit de ganze Nacht,
Itz sattock, dossr Bohne macht
Ims Haus rimm und zunn Waage zu,
Wal ich n Kaffe kochn tu,
Schonn fängt de Plotte oh zu gliehn;
Drno mechtch glei zum Bäckn giehn;
Oh frischn Sammln, noch hibsch worm,
Do isst sich unsrejs noch orm. -
Ann Wintr gings gemietlich har,
Do kohm ou tatschn jer und dar,
Jetz hottn olle Leute Zeit,
De ganze Walt wor zugeschneit;
Es wur genäht und ou gestrickt
Drzwischn ismr eigenickt
Und fadrschleissn gingmr ou
Zu moichr liebn Nopprschfrou -
Zoricke dentmr jednfolls
Wu ennr sein mog, oh dos olls,
Ock ejs, dos ländliche "W.C."
Betrauort mr ann Wintr ne.